TENGA AKABIDHI MADARAKA KWA AMANI KABISA, AGOMA KUWA KING'ANG'ANIZI.

Mutasim Jaffer kutoka nchini Sudan amechaguliwa rais mpya wa Shirikisho la soka katika ukanda wa Afrika Mashariki na Kati CECAFA.

Jaffer ataliongoza Shirikisho hilo kwa muda wa miaka minne ijayo na anachukua nafasi ya Leodegar Tenga kutoka Tanzania ambaye amekuwa katika wadhifa huo kwa miaka minane iliyopita.

Rais huyo mpya wa CECAFA alipata kura 6 kati ya 10 zilizopigwa huku mpinzani wake wa karibu Lawrence Mulindwa kutoka Uganda akipata kura tatu na Vincent Nzamwita akipata kura moja.

Rais wa zamani Tenga amesema ana imani na matumaini makubwa kuwa rais huyo mpya atasaidia kuinua soka katika Ukanda huo.

“Nina furaha kubwa ya kukabidhi madaraka kwa mtu ambaye najua ana mapenzi makubwa na ya dhati katika mchezo wa soka.Tungependa kuiona CECAFA ikikua hatua kwa hatua,”.

“ Nina furaha kuwa nimefanya bidii nilivyoweza kwa kipindi chote cha miaka minane niliyokuwa rais wa CECAFA na nitafanya majukumu yoyote nitakayopewa katika siku zijazo,” alisema Tenga.

Rais huyo mpya wa CECAFA amesema atatumia uzoefu wake aliopata Sudan kujaribu kuinua soka Afrika Mashariki na Kati.

Aidha, ameonesha kutoridhishwa na mataifa kutoka ukanda wa CECAFA kutofanya vizuri katika mashindano ya kufuzu kushiriki fainali za kombe la dunia mwaka 2018 zitakazofanyika Urusi.

Uchaguzi huu umefanyika siku moja kabla ya kuanza kwa mashindano ya soka ya CECAFA mwaka 2015 jijini Addis Ababa.