SIMBA YASEMA KAMWE HAITAKATA TAMAA KWA MAVUGO.

Simba SC imesema mpango wake wa kumsajili mshambuliaji wa Burundi, Laudit Mavugo unakwamishwa na klabu ya Vital’O ambayo haitaki kutoa ushirikiano.

Simba wanaonekana wamedhamiria kumsajili mshambuliaji wa Burundi, Laudit Mavugo lakini inaonekana mpango huo unakwamishwa na klabu ya Vital’O ambayo haitaki kutoa ushirikiano.

Rais wa Simba SC, Evans Elieza Aveva amedai kwamba wanafanya jitihada za kuwapata viongozi wa Vital’O ili wazungumzie suala la Mavugo, lakini hawapati ushirikiano wao.

“Kuna watu wanasema Mavugo kamaliza Mkataba Vital’O, lakini habari kutoka Vital’O zinasema bado ana Mkataba hadi mwishoni mwa msimu. Sasa inatuchanganya kwa kweli,” alisema Bw. Aveva.

Hata hivyo, Aveva amesema dhamira bado ni kumsajili Mavugo na wanaendelea na jitihada kuhakikisha wanafanikiwa.

Amesema iwapo watamkosa Mavugo, basi watamgeukia Mrundi mwingine, Kelvin Ndayisenga ambaye yeye iko wazi hana Mkataba.

Aidha, Aveva amethibitisha klabu yake kuwaacha Simon Sserunkuma na Msenegali, Abdoulaye Pape N’daw na kumrejesha Mkenya, Paul Kiongera.

Kuhusu Mganda mwingine, Brian Majwega ambaye jana alianza mazoezi na Simba SC, Aveva amesema winga huyo ameomba kufanya mazoezi na timu hiyo wakati huu ambao ana mgogoro na klabu yake, Azam FC.

Pamoja na hayo, Aveva amesema Kamati ya Usajili ya klabu yake, chini ya Mwenyekiti, Zacharia Hans Poppe imepewa jukumu la kusajili mabeki wawili wa kati.

“Kwa ujumla ripoti ya benchi la Ufundi imependekeza kusajiliwa mabeki wawili wa kati, kiungo wa pembeni mmoja na washambuliaji wawili,” alimalizia.