UBABE WA JOSE MOURINHO KWA ARSENE WENGER UTATAMATIKA LINI?

 

Na Oswald Ngonyani.

Inaweza ikazidi kuwapa hasira zaidi mashabiki wa ‘The Gunners’ lakini wakati mwingine ni jambo jema sana kuukubali ukweli, hususani ukweli unaouma kama huu ambao nitauzungumzia kwa siku ya leo.

Msomaji wangu usije ukajiuliza swali kuhusu ukweli upi ninaouzungumzia. Kuwa mpole, mintarafu ya jawabu la swali hili ni rahisi sana kulipatia utatuzi.

 

Nauzungumzia ukweli wa ndani ya uwanja kuhusu ubabe wa Jose Mourinho kwa Arsene Wenger.

Sijui ni kwanini, lakini pengine Jose Antonio Mourinho ana kitu cha ziada zaidi kinachoonekana kumnyima raha mara kwa mara Arsene Wenger na hata katika mechi za timu hizo wengi hujikuta wakiwa na matokeo tayari tena hata kabla ya mchezo wenyewe.

Unadhani kwanini watu huwa na matokeo ya nje ya uwanja ya mchezo baina ya Arsenal na Chelsea? Hakuna haja ya kuzunguka, uwepo wa Mourinho pale darajani ndio haswa sababu ya Arsenal kufungwa hata nje ya uwanja.

 

Tazama mchezo wa Jumapili iliyopita ulivyoonekana kuwa na upinzani mkubwa lakini mwisho wa siku Chelsea wakiwa nyumbani waliendeleza wimbi la ushindi kwa washika bunduki hao na kuzidi kujenga historia ya ubora wa Mourinho kwa Wenger.

Nakumbuka kabla ya mchezo wa Jumapili tayari rekodi za makocha hao zilikuwa zinaonekana kumpa ushindi Mourinho ingawa kikosi cha Arsenal cha msimu huu kinaonekana kuwa bora zaidi ukilinganisha na kile kilichofungwa magoli 6 katika msimu uliopita.

 

Unadhani kwanini Arsenal pamoja na kuwa na kikosi bora walilala pale darajani? Uwepo wa Mourinho pale Chelsea ilikuwa ndio haswa sababu ya watoto hao wa Wenger kuendelea kuwa ‘mdebwedo’.

Ikumbukwe kuwa kwa mujibu wa rekodi zinazohusisha timu hizo zinaweka bayana kuwa kabla ya mchezo wa Jumapili Arsene Wenger alikuwa amekutana na Mourinho mara 11 katika mechi za Barclays Premier League (EPL).

Tazama, katika mechi hizo zote Mourinho alikuwa ameiongoza timu yake kushinda michezo 6 na kutosa sare 5, huku Wenger akiwa hajawahi kuambulia ushindi dhidi ya mpinzani wake, ni kweli ukweli huu unauma tena unauma sana.

 

Ni kama kusema mchezo wa Jumapili ulikuwa ni mchezo wa 12 kuzikutanisha timu hizo na hivyo kuzidi kumpa nafasi Mourinho ya kuthibitisha ubora wake mbele ya Wenger kwani ushindi huo unakuwa ni ushindi wa 7 katika michezo yote ya EPL waliyowahi kukutana.

Kitakwimu, mpaka sasa Wenger ameiongoza Arsenal kufunga jumla ya magoli sita tu dhidi ya Chelsea  katika michezo 12 waliyokutana wakati Mourinho ameiongoza Chelsea kufunga jumla ya magoli 21 dhidi ya Washika bunduki hao wa London.

 

Ni wazi kuwa mashabiki wa Arsenal walitegemea makubwa sana kutoka kwenye kikosi kilichokuwa kimesheheni asilimia kubwa ya nyota wake wakiwemo akina Szczesny, Chambers, Mertesacker, Koscielny, Gibbs, Wilshere, Flamini, Cazorla, Ozil, Alexis, na Welbeck lakini tamati ya mchezo huo ilizidi kuwapa machungu yasiyomithilika mashabiki hao.

Wanaume hao walishindwa kufanya chochote mbele ya akina Courtois, Ivanovic, Cahill, Terry, Azpilicueta; Matic, Fabregas; Schurrle, Oscar, Hazard; na Costa ambao wameendelea kujiimarisha kileleni mwa EPL huku wakiwa juu kwa pointi tano zaidi.

Haikuwa mechi ya lelemama, ilikuwa ni patashika nguo kuchanika ndio maana hata akina Mourinho na Wenger walionekana kutaka kuzichapa kavukavu uwanjani huku mwamuzi wa mchezo huyo akionekana kutishia kuwapeleka jukwaani.

Mechi hiyo ilijaa vituko kibao ikiwa ni pamoja na kuchelewa kuanza kwa dakika 15, ambapo ndani ya uwanja ushindani ulikuwa juu huku Eden Hazard na Diego Costa wakiwa mashujaa wa Chelsea kwa kufunga mabao hayo mawili.

 

Pengine kikosi cha Chelsea kilikuwa bora zaidi kuliko kile cha Wenger lakini pengine historia ilionekana kumhukumu Wenger na hata kujikuta akiwa hana madhara mbele ya Jeshi la Mourinho.  

Ubabe wa Mourinho kwa Arsene Wenger utatamatika lini? Hapana shaka wakati utatupatia majibu stahiki.

(Mwandishi wa makala haya ni Mwandishi/Mchambuzi wa Makala za Michezo  ya Kimataifa katika Gazeti la Michezo la Dimba, anapatikana kwa simu namba 0767 57 32 87 au kwa barua pepe ngonyanioswald@gmail.com)