SANGA ONE AMEPOTOKA, HAKUWASEMEA WANARUVUMA, ALIJISEMEA YEYE MWENYEWE NA WAFUASI WAKE.

Wapenda Michezo wengi wa Mkoa wa Ruvuma hususan mchezo wa soka wapo babaikoni kwa sasa, babaiko ambalo limesababishwa na tamko la Bw. Golden Sanga maarufu kama ‘Sanga One’ Mwenyekiti wa Chama cha soka cha Mkoa wa Ruvuma (FARU).

Ni tamko la wazi kufuatia Vilabu vya Ligi kuu ya Vodacom (VPL) kugomea makato ya asilimia 5 ya fedha za klabu zinazotokana na wadhamini, makato ambayo TFF ilitaka iyakate‘kibabe’ili kutunisha mfuko wa maendeleo ya soka la vijana na kuvisaidia vilabu vya ligi daraja la kwanza pasipo vilabu husika kukubali.

Katika tamko hilo Mwenyekiti huyoameonekana kuonesha msimamo wa wazi wa kuuunga mkono uamuzi huo ‘usio na huruma’ kwa vilabu huku tamko lake hilo likionekana kuwawakilisha wakazi wote wa Mkoa wa Ruvuma, kitu ambacho si cha kweli.

FARU imetoa maagizo kadhaa kwa bodi ya ligi kuu na kumkana hadharani mwanasheria mahiri Damas Daniel Ndumbaro kuwa anayoyafanya yasihusishwe na wao FARU licha ya kuwa bwana Ndumbaro ni mzaliwa wa mkoa wa Ruvuma.

Ni kama kusema Bwana ‘Sanga One’ alikurupuka kutoa tamko hilo kwani haikuwa na haja ya kuharakisha kufanya hivyo ndio maana mpaka sasa hakuna mwenyekiti yeyote wa chama cha soka cha mkoa wowote nchini aliyezungumza chochote kuhusu sakata hilo zaidi yake.

Hajatutendea haki wakazi wa Ruvuma kwa kutoa tamko linaloonekana kuwa tamko la WanaRuvuma wote, sijui jamii ya wakazi wa mikoa mingine imetuchukuliaje sisi wakazi wa Ruvuma kwa kuunga mkono kitu ambacho hakihitaji ‘degree’ kukielewa, kitu ambacho kina dalili zote za ukandamizaji.

Mara kwa mara tumekuwa tukiandika mengi kuhusu ‘madudu’ yanayofanywa na baadhi ya Viongozi wa soka tuliowaweka madarakani, Viongozi ambao wengi wao si watu wa mpira ila wameingia madarakani kwa mlengo fulani.

Tabia zao, mienendo yao lakini pia hulka zao katika maisha yao ya kila siku ni ushahidi ulio wazi unaotanabaisha ukweli kuhusu Viongozi wengi wa namna hii ambao kimsingi hawaitakii mema soka yetu watanzania.

Mpaka sasa bado sijajua sababu iliyomfanya Sanga One auvae ujasiri wa kutoa tamko hilo kubwa, tamko ambalo kwa akili ya kawaida kabisa linapingana na wengi kwani hali ya uchumi kwa vilabu vyetu vingi ipo wazi, vilabu vyetu vingi vinaandamwa na ukata.

Sijajua kama lengo lake lilikuwa kujipendekeza kwa Malinzi au vipi lakini alichokitamka Mwenyekiti huyu kamwe hakikuwawakilisha wakazi wa Mkoa wa Ruvuma. Narudia tena tamko la Bw. Sanga One lilikuwa ni tamko lake yeye binafsi na wafuasi wake ambao wanamuunga mkono (kama wapo) lakini si wana Ruvuma wote kama wengi wanavyofikiri.

Ifikie wakati kabla ya kutoa matamko haya ni jambo la msingi kama tutarudi nyuma na kuzitathmini nyadhifa zetu kwa jamii lakini pia madhara ya kile tunachokizungumza tena mbele ya halaiki ya watu.

Huenda kuna suala lililojificha nyuma ya tamko hili lakini Je, kama lipo kuna haja ya kulificha? Wakati wenzetu katika mikoa mingine wanawaza namna ya kuzipandisha timu zao katika Ligi kuu ya Vodacom (VPL) sisi ambao kwa zaidi ya miaka miwili sasa hatuna timu katika VPL tunaitisha mikutano na waandishi wa Habari na kuzungumza vitu visivyo na ‘kichwa wala miguu’ eti kwa sababu fulani kasema, Je tutafika?

Ndio maana hata Naibu Waziri wa Wizara ya Habari, Vijana, Utamaduni na Michezo, Al Haji Juma Nkamia hakuhitaji kuumiza kichwa kutoa uamuzi kuhusu maamuzi haya ya TFF badala yake mapema jana alikutana na uongozi wa Shirikisho la Soka Tanzania (TFF) na ule wa Bodi ya Ligi Kuu (TPLB) na kuagiza kusitishwa kwa zoezi la ukatwaji wa asilimia 5, huyo ndiyo Kiongozi bora.

Kama hiyo haitoshi, kwa niaba ya Serikali, Nkamia aliitaka TFF kukutana kwa pamoja na wadau hao, halafu wafikie mwafaka kabla ya kurejea serikalini.

“Wanatakiwa wakutane, wazungumze na kukubaliana na siku nzuri ya kufanya hivyo nimeona ni Jumamosi.Baada ya hapo watakachofikia mwafaka, basi watarudi serikalini na sisi tuangalie, lakini suala la kukata fedha hizo kweli nimesitisha na sasa liangaliwe hilo la kukutana kwanza,” alisema Nkamia ambaye kitaaluma ni mwanahabari mzoefu lakini pia ni Mdau mkubwa wa Michezo tofauti na hao wengineo.

Mkutano huo unasubiriwa kwa hamu kwa kuwa pande zote tatu zimekuwa na msimamo wa aina mbili.

Bodi ya ligi pamoja na klabu hizo za ligi kuu, zimesisitiza haziwezi kukubaliana na hilo la kukatwa fedha zao za udhamini kwa kuwa mikataba ya Vodacom na Azam Tv iko wazi na haielezi hilo la asilimia tano ndio maana Dk. Ndumbaro ameamua kulivalia njuga suala hilo kwa leng la kupigania haki ya wateja wake wanaoonekana kutaka kudhulumiwa.

Lakini tayari TFF kupitia Rais wake Jamal Malinzi ilishatangaza suala hilo halitakuwa na mjadala na lazima wakatwe.Pia kwa hesabu za kawaida, inaonyesha TFF inachukua fedha nyingi zaidi kuliko hata klabu moja moja kupitia udhamini wa Vodacom na Azam TV.

Haihitajiki uwe na ‘degree’ au ‘masters’ kupambanua mdahaka huu zaidi ya akili ya kawaida sana ambayo hata mtoto mdogo anaweza akawa na majibu stahiki.

SANGA ONE AMEPOTOKA, HAKUWASEMEA WANARUVUMA, ALIJISEMEA YEYE MWENYEWE NA WAFUASI WAKE.

Naomba kuwasilisha.

Ni mimi mwakilishi wa WanaRuvuma wengi wanaoipinga kauli ya Sanga One na ile ya Rais wa TFF, Bw. Jamal Malinzi napatikana kwa simu namba 0767 57 32 87)