Lile dili la usajili la msambuliaji kinda wa klabu ya Manchester United Anthony Martial limevuja na mambo yote yako hadharani kwa sasa kuhusiana na dili hilo ambalo dhahiri inaonekana kuwa klabu hiyo na kalabu ya Monaco zilificha ukweli wake.
Jarida la Football Leaks limechapisha kwenye moja ya machapisho yake baadhi ya vipengele vya mkataba vinavyoonesha kuwa thamani halisi ya manunuzi ya mchezaji huyo ni paundi za uingereza zipatazo milioni 80 kwaajili ya mshambuliaji huyo wa zamani wa klabu ya AS Monaco ya nchini Ufaransa.
Kwa mujibu wa jarida hilo ni kuwa klabu ya Manchester United inatakiwa kulipa kiasi cha paundi milioni 50 kama malipo ya awali kwa timu ya Monaco ambapo malipo hayo yatafanywa kwa awamu na tayari klabu hiyo imekwisha lipa malipo ya awali ya kiasi cha paundi milioni 20 yatakayofuatiwa na malipo mengine ya kiasi cha paundi milioni 30 kinachotarajiwa kulipwa mnamo mwezi Julai mwaka huu.
Kiasi kingine cha paundi milioni 10 kitalipwa na klabu hiyo iwapo tu mshambuliaji Anthony Martial atafunga kiasi cha magoli 25 kwa United katika michezo yote atakayoitumikia klabu hiyo na paundi milioni 10 nyingine zitalipwa pale Martial atakapotimiza idadi ya michezo 25 kuitumikia timu yake ya taifa ya Ufaransa.
Kiasi cha paundi milioni 10 zilizosalia zitalipwa iwapo Martial atatajwa kuwania tuzo ya mchezaji bora wa dunia na hivyo kufanya jumla ya pesa yote ya manunuzi ya mchezaji huyo kufikia paundi milioni 80.
Mpaka sasa Martial amekwishaichezea klabu ya Manchester United jumla ya michezo 15 na amekwishafunga magoli 5, wakati kwenye timu ya taifa ya Ufaransa amekishacheza michezo 6 na hajafunga goli lolote lile.
Post a Comment